Актанышта узган көрәш бәйрәменең иң истәлекле мизгелләренең берсе – махсус хәрби операциядән вакытлыча ялга кайткан Азамат Галиев белән очрашу булды. Ул бүген «Батыр» спорткомплексында район башлыгы кубогына уза торган көрәш бәйгесе тантанасында катнашты . Өлкән лейтенант Азамат Галиев- яшь буын өчен батырлык, ныклык һәм Ватанга тугрылык символы.
Азамат Галиев – Аеш авылы егете. Технология техникумын тәмамлагач, ул ил алдындагы изге бурычын үтәргә китә. 6 ай армиядә булганнан соң, 2020 елда контракт төзеп, киләчәк язмышын хәрби хезмәт белән бәйли. 2022 елда лейтенант дәрәҗәсен ала, ә быел инде ул – өлкән лейтенант.
Хәзерге вакытта ул Авдеевка тирәсендә хезмәт итә, взвод командиры урынбасары , хәрби-сәяси эшләр өчен җавап бирә. Үзе әйткәнчә, махсус хәрби операциядә җиңел түгел, әмма солдатларның рухы нык: «Безнекеләр алга таба бара», – ди ул ышаныч белән.
Туган якка кыска вакытлы ялга кайткач, Азаматны яшьләр белән патриотик очрашуларга чакыралар, хәрби якташыбыз аларга тормыш тәҗрибәсе турында сөйли, рухи көч бирә. Көрәш бәйрәмендә катнашуы да очраклы түгел – ул спортның, аеруча милли көрәшнең, егет кешене тәрбияләүдә зур роль уйнавын ассызыклый.
Аның сүзләренчә, көрәш кешене чыныктыра, батырлык, ихтыяр көче һәм түземлек тәрбияли. «Көрәш – тормышта да ярдәм итә», – ди ул яшьләргә мөрәҗәгать итеп.
Аеруча куанычлысы – әлеге бәйгедә аның энесе, 8 нче сыйныф укучысы Илназ Галиев та катнаша. Бу гаиләдә батырлык, хезмәт сөючәнлек һәм спортка мәхәббәт буыннан-буынга күчеп килә.
Бүген Азамат Галиев кебек егетләр – безнең чын геройларыбыз. Аларның батырлыгы, тугрылыгы һәм көчле рухы яшьләргә үрнәк булып хезмәт итә, киләчәккә ышаныч өсти.
Азамат бүген хатыны белән әти-әни булырга әзерләнә, аларның законлы никахлашу тантанасында без дә булган идек. Без яшь парларга сәламәтлек, исәнлек, Азаматның яу кырыннан исән-сау әйләнеп кайтуын телибез.
Нет комментариев